李好味 (Closed)

唔好誤會，我講嘅係我個女😄昨晚 honey 唔得閒，問個女想去邊吃，佢話中環 lee lo mei。。。？🤔喂，做乜同亞媽講粗口？佢話中文名叫李好味！哦，原來我大鄉里。。。個名咁攪嘢，就去試試。去到樓下，唔覺係食呢啲嘢，似食西餐，waiter 哥哥帶我哋上樓上，感覺完全唔同。侍應好好人，問我哋係咪第一次嚟食，介紹咗好多嘢，可惜只得兩個人，最後點咗四樣嘢，金蝦脫殼，張相影落唔靚，但，真係好好味呀。。。👍👍👍絲酥蘿蔔糕，XO 醬都幾辣，食唔到蘿蔔糕香味，口感都唔錯。金雞藏鮑，係釀糯米雞翼四隻，當中有兩隻有舊鮑魚添。。。呢個都好食，雞翼唔會好乾，糯米飯都好味，至於鮑魚。。。。如果大舊啲可以試真啲喎🤗最後嗰樣叫乒乓菠，感覺好似迷你版菠蘿叉燒包，呢個菠蘿包係有菠蘿架，佢比較出面吃到嘅再甜少少，仲有薯條，佢點薯條個醬都好特別，唔係紅色嘅茄汁，而係橙色，開頭仲以為辣，原來佢話紅燈籠椒混茄汁，味道冇咁酸，有少少甜加啲啲辣。最後，姐姐走過嚟問我哋夠未，駛唔駛介紹甜品。。。sorry 啦，個肚已經冇位，雖然好想食，但要等下次啦。呢度收費又真係唔便宜，但食物又幾特別，味道都幾好，相信會再來試埋其餘嘅嘢😄