檀香山茶餐廳 (Closed)

星期六晚同朋友通宵打機,早上八點幾帶著半睡半醒嘅身軀去食早餐.不嬲去開出名果間已經開始排隊,個人未清醒實在唔想排隊.周圍行下最後附近嘅入咗檀香山.順帶一提呢間餐廳嘅晚飯外賣係ok嘅.叫咗火腿通同埋炸魚柳餐,都係基本上比較難做得差既餐.點餐個姐姐可能唔夠瞓,有少少躁,我只係將煎蛋改成炒蛋就畀佢得咗句"講清楚啲啦".餐飲既檸荼出奇地夠味,成個人醒晒.但到最後唔知點解上枱嘅都係荷包蛋...冇所謂可能呢度嘅荷包蛋係炒出嚟嘅呢...一定係為咗彌補我冇炒蛋食嘅損失,我隻蛋係雙黃嘅.連埋朋友唔食既蛋黃,一朝早就膽固醇超標啦.牛油方包嘅牛油好少.淨係中間有丁點牛油.店員可能體諒我啱啱吸收咗咁多膽固醇,想我食清淡啲.魚柳真係不得了呀.內外兼修,外硬內軟,感覺上炸粉外殼係為咗保護魚柳而存在,堅硬無比,有啲似手機同手機殼嘅關係.魚柳嘅味道同質感當然係一般茶仔既水準啦,但魚肉同炸粉外殼嘅反差感,突破炸粉裝甲最後食到軟淋淋魚柳果種滿足感,真係好難係一般茶仔得到.依餐真係食得開心.