Häagen-Dazs (太古城中心) (Moved) New Location

放假做孝順仔，同媽子行太古城，剛好太座亦購物完畢，一起去吃下午茶。同媽子由底行到上頂，佢唔係無興趣，就嫌貴，又或是拋低一句「我都識煮，有咩特別？」，就行左去。唯獨是當臨離開時，經過這裡，佢問「呢度野咩來架？」，佢竟然有興趣食雪糕，所以就一行三人來幫襯。呢度光猛又整潔，來吃吃雪糕傾下計，又真不錯。呢度有堂食，外賣亦可以在高檯坐下慢慢吃，價錢當然有別。我們趕著走，所以外賣算了。在雪櫃前揀來揀去，終於有了選擇，是夏威夷果仁、檸檬雪芭同綠茶。三個之中，一致投票選出，以夏威夷果仁最好味，奶味足，又夠香，不太甜，裡面有粒粒夏威夷果仁又有咬口，連媽子都說好食，無走雞；檸檬雪芭幾清新，偏酸了一點，但如果吃了肥膩的食物，以這款口味平衡一下又真的不錯；綠茶是我的選擇，比較圯其餘兩款，味道就中規中矩，綠茶味幾香，不太甜，都不錯。脆筒凍了一點，好彩都脆。不過廿幾蚊一個雪糕球，做好一點也不為過。三個球九十蚊有找，媽子吃得滿意，對於我來說當然物有所值。