祥仔辣辣 (雅蘭中心) (Closed)

名廚祥仔辣辣之烤魚😍平時行過成日見到名廚祥仔張海報，對佢嘅出品有信心。今日試咗烤魚，鍾意重口味嘅人一定要去試吓啦。鉗魚 (招牌酸菜味，微辣)我同朋友都未聽過鉗魚，所以決定一試。魚嘅肉質比較實，肉好厚，都幾適合做烤魚，因為煮耐啲都唔會散。酸菜味都幾特別，好多酸菜係面，開頭食可能覺得唔夠酸味，不過酸菜煮冧咗之後就好香好夠味，果然係招牌。我哋叫咗微辣，唔會好辣，食得辣嘅可以叫辣啲。除咗魚，我哋仲加咗幾款打邊爐嘅配菜，同埋一款小食。小食要咗紅油大荳芽，酸酸辣辣都幾好味呀，越食越開胃🤣配菜方面我覺得竹笙最好味，索晒啲汁，好夠味，又健康。蟹柳同支竹都好入味，配酸辣醬好夾。另外再叫咗娃娃菜同萵筍，呢兩樣要煮耐少少。鍾意呢度環境好舒服，茶都幾好飲，可以慢慢坐慢慢食，唔錯唔錯。