翠華餐廳 (Closed)

翠華⋯其實好參差⋯真係視乎各間管理問題去斷定邊一間分店成功與失敗。位於加拿芬道嘅翠華，可能開業多年啦，定係管理層嘅鬆懈，一入店內已感到唔太乾淨嘅感覺，可能啱啱拖完地，環境空間濕氣較重嘅關係。餐牌邊位披邊，而且痴笠笠，好明顯冇乜點去做好清潔工作！座位上有食物殘渣⋯檯面亦痴笠笠，調味架明顯冇做好日常清潔！ 作為一間咁有名氣嘅上市大公司，可唔可以做返好啲個店面，最基本嘅乾淨要做好，尊重一下食客吧！不嬲都認為翠華名過於實，價格上偏貴，食物質素亦頗參差！ 一個魚片頭河下午茶可以賣到$42一份，貴！而味道上算可以，唔會太突出地話試完一啖會「嘩！」一聲好好味，中規中矩！魚片口感上的確幾爽彈，個湯都幾鮮甜，好重魚味！河粉就一般，略嫌煮過龍，太熟！ 跟茶熱奶茶好香滑，但個杯邊崩的！唔怕會𠝹到客人個嘴嗎？換個完整嘅杯有困難嗎？沙爹肥牛撈米配雲吞 沙爹味好濃，雲吞都大粒，浸住雲吞個湯亦唔錯，好濃嘅魚香味！ 由於係上市餐廳，價錢亦收得頗貴，自然對佢要求更高，希望清潔管理上作出改善，客人除了去食一間餐廳嘅食物，食個環境亦都好重要！