小食糖 (Closed)

位於商場入面嘅食肆，大部份都係集團經營，千篇一律，悶都悶死。難得美麗華商場入面一個角落中有一間台式小店名為小角落。入去先要去櫃檯俾錢落單，自行搵位，然後就等攞嘢食。小角落嘅裝修猶如一個七八十時代嘅班房，黑板、木枱、木凳，書架上仲有圖書漫畫。佢嘅面積雖然好細，但由於其中一面對住商場中庭，所以一啲侷促嘅感覺都冇。今日去到竟然冇飯供應，朋友叫咗個牛肉麵都幾好食，我就叫咗炸雞湯麵。佢嘅炸雞好大份，炸得亦好香，真係令人覺得有一啲台灣夜市炸雞嘅感覺。五十零蚊一份麵食，而且有着咁特別嘅裝修，係抵食嘅。