樺得園 (Closed)

九龍城實在太多餐廳，不過其實唔難發現，太多數都係以泰式為主，其次就係一啲打冷鋪。呢間漢堡包店係之前想叫外賣嘅時候無意中發堀，機緣巧合之下就走咗去試。不得不說，係有啲失望。我order嘅係近江和牛漢堡，升級套餐埋單＄111，呢個價錢，我寧願食triple o。唔係話唔好食，或者係我嗌錯，和牛整做漢堡排實在欠缺結實，食落即散。不過重點都係牛味，本以為牛味會濃烈突出，點知配搭麵包同醬料嚟食係食唔出和牛嘅味道。我特登唔連包咬，剩係咬肉，都覺得有欠出色。呢個價錢，呢個份量，我對味道嘅期待係會高少少，好可惜我嘅期望落空。值得一讚嘅係薯條，炸得好出色。而且份量亦都相當多，喺我記得要影相嘅時候已經食晒。同埋除咗茄汁之外，餐廳亦會為客戶提供蛋黃醬。不過係蛋黃沙律醬而唔係純正蛋黃醬。雖然唔係純正蛋黃醬，但有呢個option提供亦都加唔少分。總括嚟講，我應該會再幫襯，但就唔會試貴價漢堡，試下其他，或者會有驚喜。