呦呦鹿鳴布丁燒

Open Now

Now Closed

葵廣係廣為人知嘅平民美食掃街天堂，行街買衫食嘢一個地方搞掂晒真係好方便。每次黎，都多左好多小食店，撈面、炸物、特色飲品，應有盡有。其中一間吸引我眼球嘅，就係呢間呦呦鹿鳴。小店舖面設計簡約開揚，仲有個別具藝文氣息嘅壁畫牆做打卡位，單係呢樣嘢已經啱晒我呢啲偽文青影相呃like。食物方面，呢度主打布丁燒，有熱有凍，口味選擇眾多，搞到有選擇困難症嘅我好掙扎！豆腐味、焙茶味、Bailey味、Earl Grey味，全部都好想試，但得一個肚，最後揀左兩個凍嘅Bailey同Earl Grey。布丁燒嘅Structure 基本上分為三層，最底係輕芝士嘅餅底，中間係吹彈即破，滑不溜手嘅布丁，面頭係焦糖。Bailey 嘅布丁燒面頭會再倒一層Bailey 酒，加重左奶味之餘，酒味又有解膩嘅感覺。由於Bailey味道比較出，而另一款Earl Grey 始終係茶味，清新但味道相對比較淡，所以顯得較為失色，不過其實佢Earl Grey味係非常足夠，如果你係呢隻茶嘅愛好者，一定會鐘意! 我自己非常推薦Bailey 味，建議大家食完其他味先食佢，咁就唔會顯得其他味好淡。