天丼

Open Now

Now Closed

還記得，當年有第一間”天丼”時，我覺得好貴。所以之前淨係食過東港城分店，今次嚟到紅磡。時至今日，一個天丼set，由幾十蚊到百幾蚊都有，唔知點解而家睇返，覺得一啲都唔貴。一個set，有廣島蠔鮑魚鰻魚虎蝦同其他蔬菜嘅天婦羅set，連冷烏冬，盛惠156。至於另一個有兩種帆立貝赤鯛虎蝦蔬菜嘅天婦羅set，連冷蕎麥麵，盛惠148。天婦羅嘅質素幾高。要講多次，天婦羅並唔係用純炸嘅方式整熟啲食材，而係用炸完嘅外層炸粉嘅熱力慢慢整熟啲食材，所以理論上入邊啲食材係新鮮無比，唔應該有過熟情況。而今日最體現到呢樣嘢嘅係帆立貝刺身，外脆內軟，相當高質。其他嘅天婦羅，例如鰻魚同廣島蠔水準都唔錯。天婦羅當然配飯係最好，但係今晚配嘅冷烏冬水準非常高，又易夾又有彈性，絕對可以一試。特別要講一個外加嘅明太子魚餅，係幾好食，明太子同魚餅嘅味道好夾。有時就係咁，夜晚百幾蚊一個人，幾好食，唔趕人走，已經係恩賜。