名 料理 (Closed)

今日行完山，決定係大尾篤海邊食個晚餐。比我發現呢度方圓一帶唯一一間居酒屋🏮，咁難得，當然同朋友係呢度解決晚餐。居酒屋最啱就係食下串燒飲下啤酒🍻。我地揀左以下：燒雞泡魚乾（$36），首先前菜食下魚乾，點蛋黃醬，本身甜甜地，又唔會太乾身。燒安格斯牛粒串（$32），呢個牛真係超正，出去食扒都好少食到咁正味道調得咁好嘅牛，油脂旺盛肉質鮮嫩多汁，牛味帶曬出黎！金菇卷牛肉串（$22），外面嘅牛肉就唔係打邊爐啲肥牛，肉質較厚身同結實，配合入面爽口嘅金菇，口感有好大衝擊～燒明太子雞翼（$16），入面嘅明太子好夠，微微帶辣，配合雞肉係極大享受。燒雞軟骨串（$16），爽口得黎調味又惹味。鹽燒海中蝦（$22），大大隻蝦真係不得了，燒完又離殼，味道正宗鮮甜彈牙，帶淡淡鹽味。日式燒茄子（$22），另外有川味嘅選擇，不過我地唔食辣，所以都係正常味好啲。調味方面唔似出面咁落重蒜蓉，反而係靠醬油同木魚絲調味。另外店主推介我地食下呢度嘅刺身，真係附近一帶都食唔到架。有帶子、油甘魚、三文魚、海膽。全部感覺都幾新鮮，味道鮮甜無腥味。飽肚食物揀左鰻魚炒飯（$88），都係日式嘅炒法，較為濕身，味道唔會過鹹，帶有鰻魚嘅啖啖香味。