一條腸粉 (Closed)

最近屋企裝修，琴日難得請一日假，就約埋好朋友一齊旺角食lunch，順便陪我去買傢私。我同佢本身都好鐘意食潮州腸粉，見到呢間一條腸粉，而且唔算多人唔洗排隊，就入去試試。之前食好多腸粉點心店都好窄好逼，估唔到呢間又唔會，佢入面都算闊落同埋光猛，唔會坐得好逼，而且乾淨企理。我地叫左2個招牌潮州皺皮腸粉，一碟係叉燒、菜脯加蛋。另外就係雞蛋牛肉腸粉。佢份量都算大碟，而且唔夠豉油可以另外叫佢加一小碗，味道唔錯，略嫌皮厚左少少，如果可以再薄d就更好。除左腸粉，我地仲叫左幾款潮汕小食同點心。呢碗牛肉餅湯真係好好飲，我同個frd share左一碗，牛肉餅紮實而且好夠鮮味，而且湯落左好多蔥，真係拍得住潮州牛丸味道，我地兩個都大讚。小食方面，我地叫左炸饅頭，佢每一粒都係迷你版，一啖一個，炸得夠酥脆，加煉奶好好味。鵪春蛋燒賣咬落juicy，菜苗餃入面真係有大大隻蝦，好足料。買單成張枱野食，一個人都唔洗一百，都幾抵食，真心唔錯。