味真 (Closed)

呢一間「味真」主打韓式燒烤，所以啲前菜小食都好講究，生菜、蘿蔔、蓮藕都有，而呢一款茖蔥都係包肉食嘅，酸酸甜甜，不過佢由韓國空運到港，香港冇咩邊間餐廳有得食㗎咋。醬料方面都好齊備，自己最鍾意嘅就係墨西哥辣椒沙律醬。燒烤嘅豬肉方面今次就有「豬皮」、「豬三層肉」、「豬頸肉」、「伊比利豬肩肉」、同埋「香腸」。而牛肉方面就叫咗「牛肋肉」同埋「調味牛肋肉」兩款。之外仲叫咗個「墨魚仔」添。想講呢間餐廳嘅質素真係好高，以上嘅有肉類都非常好味道，尤其是燒豬皮，需要知道呢樣嘢冇返咁上下功力或者心機，係一定燒唔到嘅。好在呢度嘅店員幫手燒埋，我先可以食到煙韌美味嘅燒豬皮咋。但係好食還好食，記得要留肚飲湯。呢度嘅「肥牛麵豉湯」超級好飲架。「泡菜炒飯」賣相非常之靚，食落去都非常美味。最後一定要提下呢一度嘅飲品，韓式罐裝飲品唔係成日有得飲，呢度就有幾款。唔只係相對普通嘅桃味汽水，仲有西瓜汽水同埋蜜瓜汽水，非常特別同得意。