Bugis@叻沙・海南雞飯 (Closed)

來到屯門 V City 逛街，晚餐醫肚首次幫襯 Bugis。該店美食選擇頗多，樣樣吸引，有選擇困難症嘅我地最終揀左夏季限定菜式。價錢經濟好食CP值高。看看枱頭放左會員申請宣傳單張，先知原來係別府集團，大集團唔怪得咁有質素。只係有點美中不足，餐廳餐具有點不潔，希望餐廳可以改善。無骨海南雞撈冷讚岐烏冬 $88 海南雞配飯就食得多，配撈烏冬食都係第一次，又出奇地夾喎。海南雞皮薄肥膏少，雞肉嫩無骨啖啖肉，有標準三色醬可醮，水準不俗。冷烏冬煙韌彈牙，伴有炸花生、青瓜、銀芽、酸菜等口感增添不少，淋上酸汁食非常開胃，夏天食啱晒。星洲惹味海鮮炒粿面條 $88配料甚多有大蝦、豆卜、魚蛋、芽菜、炸蝦乾、香蔥等，粿面條以醬汁炒過條條均衡上色，惹味香口好味。紅蘿蔔粟米湯 (跟餐)老火湯味道清甜無味精，正正常常。粒粒紅豆冰 (跟餐)冰涼可口，甜度剛好，粗飲管輕易啜到紅豆方便。清新桔仔特飲 (跟餐)味道的確清新，青桔比黃檸青檸更清香，其酸味也更加清新開胃。杯中果核勁多啜極都有，飲得唔暢快，最終忍唔住撈晒D果核先飲。食完味濃的炒粿面條，飲返啖桔仔特飲，味蕾瞬間清新晒，正。