新泰東南亞餐廳 (Closed)

又喺久唔久一次跟班好姊妹嘅飯局，不過，諸多原因，人脚有變，但開心嘅喺照樣能如期開飯，因為大家都忙，人多極之唔易約，雖然唔齊章，都先嚟一次小飯局 。一出電梯門，估唔到新泰個門面咁寬敞，比起好多食廈，擠擠迫迫，依度就感覺舒服好多 。就算入到裡面，亦都唔會為做生意將枱櫈排到密麻麻，反而，在柔和嘅燈光配合下，予人有一份寧靜嘅安祥感。翻過一轉餐牌，因為實在好多選擇，由小食、燒烤、湯、沙律、咖喱、肉類、海鮮、蔬菜、飯麵……等等，大家都覺得有好多想試嘅美食。好多時候，揀食乜的確傷腦筋，猶幸朋友們都唔喺咩揀飲擇食之輩，你提議吓，我和議吓，好易決定到食乜好 。餸菜未到，大家就先點點嘢飲，因為見到啲飲品甚吸引。 芒果沙冰 $38 芒果，菠蘿，兩款都喺心水口味，最後都喺決定要芒果，貪其夠香，果然，芒果味好濃香，但沙冰質感又唔算好冰喎。 番石榴沙冰 $38朋友話好正，所以試咗一啖，的確入口非常清爽， 番石榴味道獨特而清甜，真喺暑氣全消。 鹹檸檬七喜 $32好穩陣嘅選擇，應該唔會有咩太大落差。唔使等得好耐，就已經有餸菜上枱。因為我哋人唔多，小食類只要咗個小拼盤，而點多客紙米卷因為想食軟殼蟹。