一幻拉麵 (Closed)

非常喜歡食拉麵，估計喺日本起碼食過超過150家麵店。第一次食一幻係多年前喺北海道，佢喺東京站八重洲地下街新開分店時都食過，感覺北海道各店比八重洲分店好味。香港分店有生日優惠，咁我就去試吓啦。坐低填表叫濃厚豚骨蝦湯拉麵，填咗表之後周圍都見不到員工，等嘅時候見到枱面有啲小垃圾同類似眼睫毛嘅嘢，咁就自己清理咗😳。等咗幾分鐘，有員工一手攞咗張落單表粒聲都冇出😳。繼續頭岳岳咁等，見到開放式廚房裏面嘅員工亦都企定定頭岳岳望出樓面，真係唔知佢做乜😳。碗麵終於嚟到，賣相一般；我加咗三塊叉燒，大部份比蔥同紅薑冚住咗（第一張相），其實如果廚房真係用心做，就唔會咁樣，絕對可以擺得好啲（跟住兩張相係我稍為調整吓叉燒位置，已經靚好多）。日本餐飲賣相係非常緊要。湯底有蝦味亦有豬骨味，不過唔算好好味。叉燒味道一般。麵煮得太焾（冇得揀硬度）。加咗個木耳，幾爽脆，不過太甜。全程冇員工打招呼，可能員工唔夠所以服務嫲嫲，但係咁嘅服務仲要收+1服務費😳。仲有， 枱面上放有一呎高左右嘅透明膠片，但係人客坐低成個頭會高過膠片，真係唔知呢塊膠片有乜用🤔衛生、服務、味道都同日本一幻有明顯距離！但係比日本嘅一幻貴好多！