黑丸嫩仙草 (Closed)

我係芋圓呀，仙草呀，珍珠奶茶等等嘅愛好者。明白每人口味唔同，無一間舖頭滿足到所有人。今次第一次食依間黑丸嫩仙草，啲仙草如同佢舖名，係屬於嫩嗰種，我自己就偏愛有啲質感，結實啲嗰類。不過我都覺得好味嘅，有仙草味又嫩得黎唔會水溜溜咁。我叫咗黑丸Q嫩雙寶，因為又想食芋圓，又想食佢有嘅芋Q,有仙草之外，又可以食愛玉冰。芋圓比想像中普通，中上，Q得黎芋頭味弱咗啲。反而啲芋Q比芋圓大粒，粉粉地夠哂芋頭味。愛玉冰味道都唔錯，同仙草溝埋咗仲食到酸甜嘅檸檬味。成碗份量足夠，唔算勁大碗，但一人食都會飽。環境方面，外面睇尚算光鮮，但撥開透明膠簾，感覺有啲破落，我去嘅時候無人，有幾張高枱，同幾張吧凳，枱都還子，但啲凳已經爛爛地，搖搖欲墜，有啲已經無位放腳，令我考慮過企係度食⋯⋯鐘意食甜品，當然希望多幾間依類舖頭，食品質素唔錯，希望可以顧及其他要素，更有競爭力。加油！