金滿庭京川滬菜館 (德福廣場2期)

Open Now

Now Closed

金滿庭閒日比較鬆動，但到星期六日就勁墟冚。個人認為德福店無論環境同食物味道都比荷里活嗰間略勝一籌，不過呢啲見人見智啦，總之兩間分店門口通常都人山人海。以前叫開碧螺春，但近年推出咗玄米茶，陣陣米香，真係一試就愛上。砂窩雲吞雞 — 半隻雞盛惠二百幾蚊，有十幾粒雲吞。湯底好飲，唔係味精湯越飲越口渴。隻雞就老咗啲，連雞髀都嚡口無乜味。紅油抄手 — So far 金滿庭調嘅汁係我暫時食過最好食嘅一間，唔會辣到咩味都食唔到。京燒羊腩 — 一上枱就係咁嘅樣… 賣相核突咗啲，不過堅係羊腩，肉質鬆軟帶羶味，正！豆沙鍋餅 — 以前食過高力豆沙，個皮超厚但餡極少（某山莊整得好食好多）。所以轉點豆沙鍋餅，外皮鬆脆，紅豆綿滑。年初推出咗現金券，跟住就加咗價，加幅都幾勁 (粗略估計近 15-20%)。不過好食兼水準穩定嘅上海菜真係買少見少喇，所以都會繼續食