大餃子 (Closed)

唔知點解細細個已經好鍾意食餃子，到而家仍然都係咁鍾意食，最鍾意點喼汁食... 最近喺渣甸街開咗一間[🥟大餃子]佢入邊除咗餃子之外，仲有幾款🍜麵食，酸辣湯... 最搞笑係仲有腸粉同埋🥣粥，可能係因為之前嗰間老粥店冇咗啦，不過我幾次都係食餃子同埋擔擔麵，因為有我最鍾意食嘅唐芹餃，除咗好香嘅唐芹之外，入邊仲有少少孜然粉嘅味道，仲有食過韭菜煎餃，都非常出色，另外仲有大白菜同埋京蔥牛肉餃，不過呢兩款就未有試過啦，擔擔麵亦都非常出色，麵質好有咬口，絕對唔係淋pat pat，麻醬非常濃郁，另外仲有口水雞，同埋蒜頭泥白肉，不得不讚讚佢好有heart，係用青瓜包住一豬腩片然後捲埋一卷，醬汁味道恰到好處，口水雞夠香辣雞肉嫩滑...仲有控油抄手，雲吞皮係滑脫脫嘅...基本上試過三款餃子，都係皮薄多肉汁... 寫寫下好掛住芹菜飯