竜王居酒屋 (Closed)

和富中心係我兒時回憶，以前細個成日過嚟呢度玩，咁啱今日去咗親戚屋企順便喺附近食飯，原來和富中心都改變咗好多，依家都已經全新裝修，都幾靚乾淨。最尾揀咗呢一間喺樓梯位一落去嘅日本餐廳，個名都好特別㗎，叫竜王，讀音:龍王,個筷子嘅造型仲好可愛係個龍頭嚟㗎因為唔係好肚餓所以叫咗三款嘢食，食物質素都唔錯軟殼蟹沙律 $88 軟殼蟹炒得都幾香脆，最緊要唔會油膩，另外沙律嘅醬汁都好開胃，酸酸地鹹鹹地，沙律菜又新鮮。竜王卷 $108造型就真係非常之啱晒打卡，係成條龍嘅器皿，卷物上面有好多吞拿魚蓉，裏面有炸蝦，口感非常之豐富。佐水豚骨湯烏冬 128湯底好香，好重豚骨湯味，烏冬都好彈牙，份量都幾多，豚肉片大概都有八片。