釜之魂釜飯專門店 (淘大商場) (Closed)

喺淘大附近想搵一間餐廳食日式料理，朋友介紹下嚟咗呢度食，佢話食過好好食。本身我都未食過釜飯，所以好奇下先做啲research再去食。原來釜飯就好似香港人食開嘅煲仔飯，但係煮法有啲唔同，而且唔會落醬油，味道可能比較淡口，不過由於係因為用高湯煮出嚟， 所以煮出嚟嘅飯本身都有味道。睇完我都覺得幾期待呢一餐。餐廳店舖尚算舒適，但係服務員好似比較少， 想落order嘅時候都搵唔到人。最後叫咗金魂同銀魂。金魂嘅鰻魚燒得唔錯，份量尚算接受， 食落啖啖肉。但係一食落啲飯，我就好失望。首先，飯質太淋但係偏乾身，食到個口漿住漿住。另外，飯入面根本就食唔出有乜特別味道，要加多啲鰻魚汁先可以繼續食落去。銀魂更加令人失望，因為鰻魚已經覺得比較乾身，成個飯要額外加鰻魚汁先可以食完。總結嚟講，有啲糟蹋咗啲鰻魚。。。由於本人比較著重飯嘅味道同埋口感，所以呢一餐都比較令人失望，有好大嘅改善空間。