吉列牛忌廉烏冬專門店 (百樂中心) (Closed)

今朝有事過黎銅鑼灣，於是順道係銅鑼灣覓食醫肚。突然想食烏冬，所以入左呢間吉列牛忌廉烏冬專門店食午餐。餐牌有好多選擇，結果我地揀左美國頂級牛里脊套餐，咖哩忌廉牛肉烏冬同咸蛋薯條。首先上菜既係牛里脊，有芝士大啡菇同洋葱伴碟。另外佢仲附有一個鐵板俾你放牛里脊同大啡菇上去燒。牛里脊並唔係全熟，生生地，你可以自己決定再燒幾耐先食，幾好玩。牛里脊肉質淋淋地，易咬唔韌，幾好食。芝士大啡菇再燒下佢惹味好多。咖哩忌廉牛肉烏冬除左有牛肉粒，仲有洋葱，西蘭花，菇，都幾豐富。個汁同烏冬好夾，令到烏冬食落好入味又滑嘟嘟。咸蛋薯條十分邪惡，食完好飽肚，好有罪惡感，哈哈。