老爺冰室 (Closed)

下午茶時間幫襯咗呢間茶餐廳，因為唔係好肚餓，見個餐牌寫住「食神湯麵」咁爸閉，於是叫咗叉燒煎蛋湯通粉配合桃莎莉蛋糕，野飲就要咗熱咖啡。杯咖啡真係好好飲，有驚喜，香濃做到恰到好處，難得茶餐廳都做到咁嘅水準，真心掂。個叉燒煎蛋湯通粉嘅煎蛋竟然係煎到脆邊，唔知係佢一向都咁高水準定係我好彩呢？下次幫襯再試試先。合桃莎莉蛋糕都幾過癮，真係好耐無食過莎莉蛋糕，呢度竟有得跟餐。佢呢度薄薄地切兩片，不過我個人覺得厚切咬落去會開心啲。