綠野仙踪台式茶座 (Closed)

昨晚又同長頸鹿去搵食啦(唉!又係例牌節目),本來想去食大家樂的焗豬扒飯,但男友話無野啱佢食,無法啦,咪跟左佢來呢度食.入到去,竟然見到按摩師,大隻佬同奄尖婆係度開緊餐,又會咁橋! 長頸鹿話不用佢地請我地食飯,但按摩師堅持要請,既然有人請,就有大食大啦!(嘻!好似好衰女咁呵!)我叫了咖喱牛腩焗飯同藍苺奶茶,而男友叫了黑椒雞扒米線同泡沫咖啡.藍苺奶茶幾甜,藍苺味幾濃(雖然明知係糖漿),我懷疑係因為我才有這杯特飲的誕生(以前曾在一間台式飲品店工作,周不時都會用藍苺糖漿溝奶茶來飲,同事都覺我怪,驚我亂溝會肚痛,但我覺得好夾,飲咁多次都無事).而雞扒試左一塊,ok啦.今次最想講個焗飯,之前家人都曾打飽少少焗飯回家食,試過幾口,都幾好食,但發覺餐牌上係無葡汁的,於是試下叫咖喱.上枱時,飄來的唔係咖喱香,而係葡汁香,真係俾我估中.牛腩飯個面燶左少少,裡面有薯角同甘荀,係白飯底,如係炒飯底會好d.試左一口,幾香葡汁味,而d蔬菜伴著個汁一齊食都ok,但牛腩就有d柴,麻麻地.比起上次的肥,今次的食物確係好左d,服務又好左d,算啦,可以繼續留低啦!