小王牛肉麵 (Closed)

好耐無寫食評，但係不吐不快，呢間小王平時好少幫襯因爲食物好一般，但下午茶時間週圍都多人，係佢有位就是旦！我家姐原本想食吐司，但侍應無麵包，就叫左個［半筋半麵］，個麵上枱我地都登大左眼，成碗麵得三件筋一件同手指公咁大嘅牛肉，但我地都無諗住投訴反正唔太肚餓，直到有對情侶坐我响我地隔離，又係叫呢個麵，一上枱佢個反應又係疑惑點解個麵明明寫「半筋半肉」但上枱碗麵九成都係筋得一舊肉，佢於是乎投訴，但姐姐態度非常差：「你叫嘅係咪下午茶餐，下午茶係一舊肉，你要多啲肉就加$30會多一舊肉」，哇～加錢都係多一舊咁大把🤔咁個男人就好嬲話要投訴去消委會，因為咁樣有誤導成份，於是乎姐姐叫經理嚟，個經理都係講返同一說話，問佢咁你換過定係點，咁佢就換咗第二樣。事件去到呢度其實我哋都唔關事，但當我地食完飲緊嘢嘅時候，態度差個姐姐同我地講佢哋夠鐘食飯，要我地走佢哋要食飯，話我地想傾計就坐另外一到，我哋當然唔肯，因為佢態度真係很差，個姐姐係跟住大力將兩張枱拍埋大力將佢筒飯放喺我哋隔離! 今時今日咁樣服務態度，食物質素又唔係好，唔知仲可生存幾耐😡