唐記包點 (朗屏商場)

Open Now

Now Closed

唔想煮飯，近近地去咗唐記買飯盒！估唔到除咗蒸飯外，唐記仲有特色客飯，例如滷肉滷蛋飯，豬軟骨飯及咖喱雞飯，每款都係$29！試咗滷肉滷蛋飯，飯量一如以往地多，醬汁放另外一格，入面好多滷肉，每啖都食到滷肉，非常足料，絕不欺場。如果滷肉可以瘦番少少就更好啦！阿妹就想食得清淡D，佢揀返唐記嘅健康蒸飯系列。雞蛋牛肉飯($25)有荷包蛋，雖然都知有D吹毛求疵，但如果荷包蛋唔係咁熟就完美啦！牛肉餅大大份，肉質唔韌略帶嚼口。見到唐記推出咗粥品，原先都想一試，可惜已經售罄，唯有買幾個凍包留作第二天早餐。隔水蒸5分鐘就得，真係好鍾意食唐記嘅中式包，熱辣辣蒸好嘅饅頭入口軟熟，香芋包($7)餡料豐富飽滿，蔥花卷($7)加咗唔少鹹香嘅蔥花喺饅頭入面，味道較為清，但毫不單調。