Video
Read full review
2018-07-22
230 views
筲箕灣東大街向來是搵食嘅好地方，由小食、正餐，以至甜品，應有盡有。上次同老公兩個去咗「八沢」食招牌拉麵，趁今日假期，不用上班，就一於去東大街走番轉，而今次嘅目標就係位於東大街同杜雲里交界嘅呢間「有錢佬靚粥」。其實嚟之前有睇過網上食評，知道店子嘅粥品真材實料，而且除咗傳統粥外，仲有好幾款五顏六色嘅粥品供應，例如呈浪漫紫色嘅紫心番薯粥、金黃色嘅南瓜芋頭粥、鮮橙色嘅泡菜牛柳粒粥等，甚具創意，所以一直想找個機會來一探究竟。小店地方不大，以外賣為主，舖面十分簡單，不過亦設有幾個堂食座位。牆身上貼有餐牌，粥品選擇非常豐富，約有 14 款，定價由 $10 到 $36 不等，價錢貼地，另外亦有多款佐粥小菜同開胃小食可供選擇。如果唔想食粥嘅話，其實店子亦有幾款夏日冷麵、豆漿粢飯同冰碗甜品等可供選擇。粥品嘅款式真係非常多，其實款款都好想試，心大心細，最後揀咗鮑您滿足同犢舞京華。鮑您滿足 ($29) 以瓦鍋盛上，大大煲，分量十足，內含原隻汁煮鮑魚、滑雞同花菇，上桌時仍滾熱辣，米氣四溢。粥底綿而滑，入口帶米香，鮑魚雖然唔算大隻，但食落腍滑不韌，加埋雞肉同冬菇，十分足料，以咁嘅價錢，絕對抵食。至於另一碗犢舞京
筲箕灣東大街向來是搵食嘅好地方，由小食、正餐，以至甜品，應有盡有。上次同老公兩個去咗「八沢」食招牌拉麵，趁今日假期，不用上班，就一於去東大街走番轉，而今次嘅目標就係位於東大街同杜雲里交界嘅呢間「有錢佬靚粥」。
其實嚟之前有睇過網上食評，知道店子嘅粥品真材實料，而且除咗傳統粥外，仲有好幾款五顏六色嘅粥品供應，例如呈浪漫紫色嘅紫心番薯粥、金黃色嘅南瓜芋頭粥、鮮橙色嘅泡菜牛柳粒粥等，甚具創意，所以一直想找個機會來一探究竟。
小店地方不大，以外賣為主，舖面十分簡單，不過亦設有幾個堂食座位。
牆身上貼有餐牌，粥品選擇非常豐富，約有 14 款，定價由 $10 到 $36 不等，價錢貼地，另外亦有多款佐粥小菜同開胃小食可供選擇。如果唔想食粥嘅話，其實店子亦有幾款夏日冷麵、豆漿粢飯同冰碗甜品等可供選擇。
粥品嘅款式真係非常多，其實款款都好想試，心大心細，最後揀咗鮑您滿足同犢舞京華。鮑您滿足 ($29) 以瓦鍋盛上，大大煲，分量十足，內含原隻汁煮鮑魚、滑雞同花菇，上桌時仍滾熱辣，米氣四溢。粥底綿而滑，入口帶米香，鮑魚雖然唔算大隻，但食落腍滑不韌，加埋雞肉同冬菇，十分足料，以咁嘅價錢，絕對抵食。
至於另一碗犢舞京華 ($36) 其實就係蔥爆牛肉粥，講真蔥爆牛肉就食得多，不過用嚟做生滾粥材料，配搭非常新穎。粥品煲得火候剛好，綿身濃稠；牛肉下得非常慷慨，嫩滑可口，肉味濃郁，加上蔥段，跟生滾粥味道合拍，令人吃得滋味滿足。
佐粥小菜有紫菜豬肉鬆、台式脆瓜、雪花皮蛋、韓國泡菜、香辣菜脯粒、脆炸魚皮、飄香腐乳王同蒸鹹蛋黃。呢三款係脆炸魚皮 ($5)、紫菜豬肉鬆 ($5) 同蒸鹹蛋黃 ($6)，價錢非常經濟，幾蚊已經有交易。炸魚皮脆度十足，極之香口；豬肉鬆夠曬鬆化，入口即溶；鹹蛋黃鹹香惹味，用來送粥一流！
另外開胃小食就有香煎豬肉韭菜餃、蒸魚蓉燒賣、蘿蔔糕、蒸牛肉球、黃金鮮蝦餅、香煎芋頭餅、蓮藕餅同蒸潮州粉果等。呢兩款係黃金鮮蝦餅 ($25) 同香煎豬肉韭菜餃 ($20)，蝦餅用料十足，除咗蝦肉，仲有粟米粒同墨魚粒，食落爽口彈牙。韭菜餃餡料多又新鮮，食落既 juicy 又有肉味，一點也不油膩。
食完熱辣辣嘅粥，梗係要整番碗冰凍嘅甜品降降溫，揀咗呢款鮮果涼粉 ($18)，賣相係咪好吸引呢？用料都好足架，除咗涼粉外，鮮果有西瓜、芒果、菠蘿等，材料堆得滿滿。涼粉爽滑挺身，入口滑嘟嘟；水果夠曬冰凍，食完簡直透心涼。講真，仲有好多款粥都好想試，不過兩個人食力有限，有時間一定會再嚟試下店裡的幾款五顏六色粥同招牌有錢佬粥。
Post
