The Joomak (Closed)

黎到尖沙咀The Joomak食韓國菜，朋友book左7點鍾，入到黎嘅時候唔算好多人，打開menu見到混醬炸雞已經覺得好似幾特別，有六種醬任你點。於是乎我地就嗌左一份混醬炸雞，一份紫薯炸蕃薯條，一份韓式松子仁吞拿魚紫菜飯卷一個素嘅韓式拌飯同埋一個甜辣醬炒年糕。先講左個炸雞先啦，炸雞就咁食係唔錯嘅，炸得啱啱好而且啖啖肉，不過醬汁方面就麻麻地，雖然佢d醬汁好似好特別咁，有士多啤梨醬，擔擔醬之類。。。但係6款醬只係得擔擔醬叫做好食d，其他醬同炸雞唔係好夾，好夾硬黎。不過值得一讚嘅係店員會親自幫你筆d醬係個兜到方便混醬同埋會每一種醬都講解一下。而紫薯炸蕃薯條呢，其實佢只係係d蕃薯條上面撒上紫薯粉，普普通通甜左少少，可能都係食慣左咸嘅薯條，食紫薯味嘅蕃薯條有少少唔慣覺得奇怪。最好食嘅係吞拿魚紫菜飯卷，好重吞拿魚味，本來想問waiter拎醬點都可以慳返，就咁食已經好夠味，好食!炒年糕比起出面餐廳嘅失色，原因就係配料少，只係得年糕同埋少量嘅菇，偏辣。至於素嘅韓式拌飯呢。。。可以唔洗試。呢間餐廳提供嘅野食同野飲都比較特別，但係價錢偏高，而且食物質素唔值呢個價，唯一可取嘅係個吞拿魚紫菜飯。