Via Tokyo (Closed)

黎到尖沙咀，岩岩食完個正餐，又唔想咁快同難得見嘅朋友散，自然就係要搵甜品食下。見到門口都有人排，本住見到人龍，代表唔會伏嘅心，就入左去喇。餐廳比較少2人座，如果2個人黎，好大機會會同其他人一齊坐，格局都唔算大，如果想坐耐啲傾計嘅話，唔算係一個好選擇。甜品方面，以綠茶雪糕為主打。咁自己就嗌左個黃豆粉白玉紅豆抹茶雪糕，因為個雪糕可以轉做培茶、綠茶或牛奶，自由揀兩款mix,咁我當然唔執輸，就揀左培茶同綠茶mix。一上檯，人都呆左呆，個雪糕未免斜得太過分啦掛！斜足45度，見到個雪糕咁，已經有少少失望。講番雪糕本身，培茶嘅香比較重，都仲食到茶味，但綠茶偏甜，但都唔算話差，但覺得一間專做綠茶雪糕嘅甜品鋪，得咁嘅水準，就覺得真心麻麻喇。雪糕隔壁都有啲配料嘅，紅豆做到起沙，加埋雪糕食，雖然有啲偏甜，但都係ok嘅。黃豆粉本身味就淡，加埋雪糕冇令佢突出左，都係同棉冰襯啲。之餘白玉，可能係我本身就唔識欣賞嘅關係，覺得係一舊冇味嘅糯米團。友人果杯，冇咩點食就唔加以評價，但雪糕都係斜嘅。總括黎講，性格比偏低，加上雪糕類嘅甜品，溶得快，要好快就食完，冇得坐得耐，本身就唔係一個好嘅下場選擇。