興記菜館

Open Now

Now Closed

今日同相識多年，加拿大返港嘅朋友聚會，就帶竹星妹朋友到最地道嘅油麻地食個煲仔飯。 起初諗住食四季煲仔飯， 但係排隊嘅人實在太多， 目測估計起碼要等一個鐘， 基於咁既原因， 我哋就去咗隔離嘅《興記菜館》。 呢間大排檔舖面較大， 雖然都有人龍， 單排兩三個字就已經有位。呢度嘅煲仔飯價錢相當之抵食， 三四十蚊已經有一個，論價錢簡直冇得輸。叫咗個【排骨臘腸煲仔飯】， 煲仔飯即叫即煮， 等嘅時間大概十分鐘， 邊食邊等其實時間好快過。 上臺之後就淋上煲仔飯豉油， 再焗一焗，食得！ 可能價錢平， 排骨方面淨係得幾舊， 只係蓋過飯面三分一位置， 不過價錢咁平，算！ 排骨算多肉， 但係就比較鞋口， 至於臘腸， 就認真細條， 得兩條脆皮腸咁長， 好可憐。 至於煲仔飯嘅重點： 飯焦， 就簡直唔得啦。 飯焦真係焦黑色， 真係食多啖都怕生cancer， 所以我哋都唯有放棄。唔怪之得隔離間四季咁多人排隊， 呢間興記應該係執死雞， 捉緊著食客唔想排隊嘅心態。要好好記住，排隊唔一定好食，但唔使排就要考慮吓。