鹵八鵝店

Open Now

Now Closed

煮飯煮左個幾星期，靈感開始江郎才盡，今日出開灣仔，決定幫趁鹵八外賣，黎個啖啖肉晚餐。今日買左半隻鹵水鴨、一隻鹵水鵝腎、一隻鹵水鵝肝同一份潮式鹹菜。三款食物既鹵水做得唔錯，有其鹵香但又不至於搶去食材本身味道。鹵水鴨肉無鴨膻味，半隻鴨份量亦唔算少，兩個人食仲有剩，可以留作下餐炆支竹。鵝肝火喉剛好，有淡淡肝臟油香味但絕不覺得膩或者口感太老，連一向唔鍾意食肝臟既老公都密密夾。下次一定要買夠兩隻！鵝腎亦係後悔買得太少，質感爽口而不靭，肉質充滿鹹香，買得一隻實在唔太夠食。見到老公好想繼續夾但又忍口讓我，真係有啲後悔買得太少令大家未能盡興。潮式鹹菜反而有啲出乎預期。我心目中既鹹菜應該係鹹菜豬肚湯果種鹹鹹香香既醃菜，但鹵八既潮式鹹菜其實係餐前小食鹹酸菜，我實在失策！因為我真係好鍾意鹹菜豬肚果種鹹菜！鹵八雖然叫「鵝店」，但其他鹵味一樣有水準，各位不妨叫多幾款食物，好好enjoy！