瑞士咖啡室 (Closed)

所謂「新屎坑三日香」，有新舖當然要湊下熱鬧。咁啱見到有人喺將軍澳個FACEBOOKGROUP到講明德有間新嘅餐廳，咁就緊係要去試吓啦！約咗他係坑口等然後一齊行過去，入到明德商場，離遠都見到有一大班人圍住一間舖嘅門口，目的地即刻非常明顯！埋去問個姐姐拎咗飛等位之後，居然要等成廿幾張枱咁多，究竟間嘢可以有幾好食，令到一間冰室都可以派咁多張飛？正想離開嘅時候就聽到有人講：「啲優惠券今日用唔到喎，遲吓先食啦！」笨安妮即刻話：「我哋等啦！」唔使半個鐘，就已經有位啦！間舖都幾細，啲位一眼睇曬！而個招牌都相當有趣，成個舖名都係用麻雀砌出嚟，唔知一共用咗幾多副麻雀呢？老闆係咪好鍾意打牌？望吓個餐牌，真係嚇到有少少跌咗係到，係一個街坊商場入面竟然會有啲咁貴嘅嘢食，「撈公仔麵餐」跟杯嘢飲竟然要成40幾蚊，我就睇下你有幾好食！咁安妮與他，就各自叫咗一個「瑞士雞翼撈公仔麵」同「滑蛋肉片飯」。（其實其他嘢食價錢都OK，係笨妹死命要叫撈麵。）瑞士雞翼撈公仔麵 加飲品$42額，搵條菜望吓都無，張相唔執，只會見到白色碗載位一堆黑色嘢。（其實執完仲奇怪，因為唔識執。）呢個麵一共有兩隻雞全翼，成碗麵就大約有1個半麵左右。