Sweetology (Closed)

買好飛等睇戲睇早埸，見仲有成45分鐘先至入場，咁見仲有咁多時間，我哋就行入去呢間餐廳食嘢啦，因為呢間餐廳就喺戲院入口隔離嘛，原本以為方便快捷，點知就中伏。究竟點樣中伏，而家就講。伏一 : 入到去坐低，嗌好嘢食之後， 足足等咗15分鐘先有一杯檸檬茶，好似係hea住比你咁樣， 感覺就好似係 "袋住先啦" 咁樣。伏二 : 等咗成30分鐘，仲要向侍應三催四請先至有份早餐到枱，大佬我趕入場睇戲呀，得番少少時間，要我擒擒青咁食， 想唔燥底都唔得呀伏三 : 難食鬆餅、炒蛋、腸仔$38，份餐又遲嚟，啲嘢又唔好食，兩件pancakes都腍ber ber，而且又冇煎香，感覺好似係微波爐叮出嚟咁，炒蛋還算ok都算滑，條腸都係正正常常豬肉腸咁囉。凍檸檬茶，味道好一般，冇乜茶味。服務又差！出菜又慢！嘢食又唔好味！ 下次真係唔會再嚟食！ 好彩我哋食得快，如果唔係就趕唔切入場睇戲，真係好唔開心囉。