永樂餃子店

Open Now

Now Closed

地理位置方便，係正生記對面。入去食飯嘅時候剛好六點，見到老闆同老闆娘食緊佢哋嘅晚飯阻住佢哋真係有啲唔好意思。坐低之後剛好有一個客人入嚟堂食，聽到佢叫羊肉餃子同朋友發現新大陸一樣，覺得比較少見所以都同朋友決定要點一份試下。兩個人分別叫咗兩碗雙拼餃，分別有羊肉餃子、鮮肉韭菜餃、香菇粟米餃、鮮肉芝士餃。 外加一份酸辣土豆絲，土豆絲口感清爽，佢哋嘅版本辣係偏辣油而唔係椒麻，但亦唔會太辣。羊肉餃帶羊肉應有嘅騷味，但如果唔鍾意食羊嘅人就可以唔使叫，你一定頂唔順。我同朋友都係超級鍾意食羊肉嘅人，食到意猶未盡。鮮肉韭菜餃正常。香菇粟米-個人就唔係太鍾意有粟米嘅餃子，整體偏甜同埋蔬菜感滿足。鮮肉芝士餃就純粹想試下新派嘢，試一次就夠因為本人都係鍾意食傳統嘅餃子。永樂嘅餃子皮係偏厚北方口味，麵粉感較強，一碗八隻落肚，我食完之後真係飽到差啲企唔穩。性價比好高，最後離開鋪頭嘅時候見到可以外賣一打羊肉生餃，如果以後經開呢頭都會再幫襯。