野菜咖喱事務所 Curry Man (Closed)

同朋友約喺葵興站等，經過外面大馬路，見到有一間門口好細，外面得四五張枱嘅餐廳，其餘任何擺設都冇，但係見到佢枱面痴咗文宣，就忍唔住坐低咗。呢間小店專係食日本咖喱，款式唔算多，基本上全部都係日本咖喱飯，只係可以選擇唔同嘅配菜，有雜菜有牛肉有豬軟骨有蜜糖雞扒，我掙扎咗好耐豬園骨定雞扒好，最後都揀咗雞扒。佢上碟個賣相非常之好，未放入口啲咖喱聞落已經好香，份量都非常足夠，用嘅係日本米，好軟熟，撈埋咖喱汁食非常好味，佢雞扒煎得唔錯，用咗蜜糖甜甜地，雞皮煎到非常香脆，雞肉唔會煮到太老，夠晒juicy，跟餐仲會送一杯低糖綠茶。價錢都唔貴，平民化，值得推薦。