吉野家 (Closed)

同朋友係銅鑼灣番工，到3點左右放lunch所以想係附近搵間近近地嘅餐廳解決，大家傾過之後發現大家都好耐冇食吉野家，所以就決定係吉野家食個tea。朋友嗌左個牛肉米粉下午茶餐，餐廳會將米粉同埋牛肉分開裝，米粉入面主要會有海苔同埋木魚絲。湯底比較清淡，所以木魚絲同海苔嘅重要性非常大，因為佢可以令湯底冇咁單調。牛肉量下午茶餐黎計都叫可以接受，如果好肚餓嘅朋友，我會建議可以叫平時多叫嘅牛肉飯會比較飽肚。而我就叫咗個牛肉烏冬下午茶餐，佢同米粉唔同，牛肉會直接放喺烏冬上面。另外烏冬亦都會有獅子狗同日式魚蛋，比米粉會有更多嘅配料。湯底方面，烏冬湯底會比米粉濃郁，而且烏冬唔會煮得太耐而無咬口。牛肉就有正常水準，濃味而唔會太咸。下午茶餐黎計，30蚊左右可以叫到一個米粉或者烏冬，係打工仔之選！