荃灣鍋貼大王 (Closed)

依間鍋貼話八點關，但七點去已洗梗嘢，試過買返去食已硬哂。以為早收會早開，當佢早餐店今次一早去，但原來九點半先開，剛剛開舖，一次過買幾樣返去，睇吓質素會唔會好啲。榨菜肉絲雞翼麵，有幾種麵，唔特別講就俾上海麵，粗切榨菜幾多，肉絲都見到，估唔到仲搭生菜，成碗麵不過不失。炸雞翼另上，兩隻偏細，但皮薄微脆，肉質滑，仲帶少許油，算唔錯。炸豬扒，單點一嚟要兩件，本來見多人叫都有啲期望，可惜皮唔脆，肉充滿加工味。炸韮菜餃，外表好似炸到好硬，但咬落又唔會，皮炸得透，脆感剛好，入面有韮菜同肉香，無入到油，比預期好。生煎鍋貼，今次果然唔硬，皮微軟，厚薄適中，每一口都咬到肉。但食完上面炸餃後感覺比下了，當然炸餃就貴啲。紅油抄手，當你以為佢啲餃全部好食，就錯啦！餃本身無問題，但點解有肉鬆？可能地方問題，但肉鬆同蒜一齊嘅味道真係好奇怪！成本係高咗，售價都多咗，但兩樣加起一齊就算浸湯都救唔返，完全浪費。整體質素差都幾大，麵要飽肚無問題，質素較好有炸雞翼、炸韮菜餃同生煎鍋貼，但都唔到覺好食，堂食可能好啲，但過度唔適合慢慢食，難怪個個都走去食八方。