日常素食 (Closed)

由於好朋友喺早幾日同我們講話喺黃大仙中心北館見到有間叫「日常素食」嘅素食自助餐，所以就佢就問我們會唔會有興趣一齊食？我們話：「好呀！」所以我們就約埋喺今日星期六四個人一齊去食下午茶嗰個時段！因下午茶時段係無得訂位，所以我們要提早去到現場排隊等位！等到2點鐘下午茶時段開始，店員就安排我們入坐，坐好之後我們就出去攞嘢食，行到出去見到啲食物唔會因下午茶新一個時段而攞過一盤全新嘅畀新一批人客享用，而係要我們攞返之前午餐時段嘅人客食淨咗嗰啲！其實憑良心講，我亦唔係想餐廳將啲食物倒晒去而浪費食物，店員可以將之前淨返嗰啲收返入廚房，之後再同另一啲新添加嘅擺放喺一齊再攞出嚟，咁樣整個賣相已經唔同晒，兼令新時段嘅人客覺得有被尊重嘅感覺！而食物方面，款式選擇唔係好多，味道亦唔會太鹹或太淡！至於員工嘅服務態度就係我要重點投訴嘅一點！我們都知道下午茶嘅用餐時間係75分鐘，但仲喺未夠55分鐘嗰陣，我們諗著出去攞啲水果入嚟食嗰陣，就畀呢位女店員阻止，我們問點解？佢就大聲話：「你們已經夠鐘要走，唔可以再出去攞任何嘢食同飲品！」我們話：「都未夠鐘，仲有20分鐘先夠鐘！」女店員就一直強調話夠鐘㗎喇，兼且用個身嚟阻擋著！