金滿堂甜品

Open Now

Now Closed

食完飯阿女話要食甜品，淘大商場附近都有好幾間選擇，睇咗餐牌，最後扑鎚食呢間金滿堂。間鋪唔大，坐得幾逼夾。餐牌上嘅選擇妥多，睇咗一輪，阿女揀咗個芒芒小丸子，阿仔嗌咗個金玉滿堂，而我就比較唔好彩，想要嘅甜品都賣晒，揀到第三次至揀到個「樂天」。啲甜品話都冇咁快就送咗上枱，大家嘅第一個反應都係話呢度嘅甜品好，因為真係唔係太甜。首先要講嘅係碗芒芒小丸子，除咗芒果同雪糕，仲有小丸子同大量嘅水晶珠，阿女就係睇中啲珠仔至揀佢的，加埋芒果汁底，話非常之滿足喎！阿仔嘅金玉滿堂其實係芒芒小丸子嘅升級版，比芒芒小丸子多咗龍眼同蘆薈，基本上佢哋兩個嗌嘅嘢其實都係差唔多。我要嘅「樂天」最後送上。呢個甜品係紫米露底，除咗有芒果之外，仲有啲清心丸同一個自選嘅雪糕（我揀咗奶茶味）。我一向鍾意紫米做嘅甜品，呢度嘅紫米煮得好，夠冧，加埋啲牛奶味道啱啱好，非常合我心水。好在我哋嚟得早，唔使等就可以入座，我哋走嘅時候出邊已經有一條人龍在等位。睇嚟呢間甜品店嘅人氣真係唔錯，有機會會再嚟試佢其他嘅甜品。