嫦記 (Closed)

星期日無無聊聊，兩公婆坐叮叮入跑馬地行個圈。之前無做功課，所以唔知有乜好食，諗住熟食中心會胃口，就上試。中午時分，只得三檔有開：「嫦記」同「銖記」做粉麵飯，「昌記」就做多士、啡茶。我幾肚餓，「嫦記」阿姐又sell得落力，無乜所謂就幫襯「嫦記」。未叫阿姐已經好識做，送兩碗例湯(白菜豬骨湯)俾我，幾好飲，白菜亦好食。佢有$22三飯，不過又唔係趕時間，梗係唔食一早整好喇。於是叫椒鹽骨套餐，包飯同送汽水($30，係大枝裝可樂)，另外加碟星州炒米(又係$30)。即整等一陣至有得食。椒鹽骨用上帶些少肥肉排，咬落幾鬆軟，分量亦唔少，只係稍嫌椒鹽味輕。星州米亦炒得唔差，幾均勻，係嫌佢料少(蝦得幾粒仔)，同埋唔夠辣。熟食中心食$30個午餐唔講得平，不過有水準，招呼又好，食得過喇。