Favilla Cafe (Closed)

成五點鐘先喺鰂魚涌做完嘢，匆匆忙忙喺附近搵間 cafe 食晚餐，結果搵到呢間，店仔細細，幾個 staff 好似係一家人，阿媽負責整嘢食，阿仔就招呼客人，都幾溫馨🥰。叫個煙三文魚牛角包配雙倍芝士味噌炒蛋，以為係成個包夾住啲餡上，原來所有嘢分開上，有啲似配料少啲嘅 All Day Breakfast。當中我最鍾意炒蛋，味噌味幾濃，入面啲芝士多到可以拉絲😍；牛角包牛油味唔算濃，不過質地幾厚實，較為飽肚；紫薯蓉頗為香甜，質感綿密，唔錯；至於煙三文魚同沙律菜就正常水準。對面位叫咗件柚子芝士蛋糕，我食咗一啖，柚子味同芝士味都幾突出，好食👍。飲品方面，我杯 Cappuccino 比較 nutty，係我鍾意嘅味道；對面位杯 Matcha Latte，據佢形容，抹茶味非常濃郁，睇嚟都係高質嘅。