碗碗香 (Closed)

係銅鑼灣放工，又無約人，於是就上Openrice望下有咩餐廳好食，見到依間店咁多好評就黎試下。鋪頭位置都好方便，係地鐵F出口直行5分鐘左右就到。鋪頭比我既第一印象係幾溫馨，除左因爲門口有好幾個OL放工一齊打邊爐，仲因爲入面細細地，但擺設同佈置就充滿民族風。店員亦都好熱情，同食客有傾有講。一坐低店員就好nice咁問我食唔食得辣，其實我去譚仔只係食得十小，所以就照實同佢講唔係好食得，於是佢推介我食清湯牛肉粉，話如果想食辣可以加枱上既辣椒粉。野飲方面，我好好奇苦丁茶係咩黎既，店員就話係可以清熱解毒既綠茶，好受歡迎，於是我又叫左杯。食物好快就到，牛肉好腍好易入口，D粉亦好特別，幾爽口。椰菜醃過酸酸地，中和到湯底既少少油膩感。雖然係清湯，但都唔會食到口淡淡，香料充足，相當開胃。苦丁茶亦好清熱，苦中帶點甘，同味濃既牛肉粉配搭得相當好。