大滿喜日本料理 (Closed)

唔講咁多，農曆新年之前，一齊食返個放題啦！花之戀：沙律醬太多，完全掩蓋晒三文魚嘅味道，三文魚子份量較多，令到整道菜唔夠精緻，略嫌失色。天婦羅：粉漿太厚，但係都crispy, 蝦夠爽口，蝦味充足。但係南瓜太腍，略嫌失色。至於蟹柳，當然唔係真架啦，所以不作評論。刺身：整體上而言，刺身係夠新鮮嘅，但係三文魚唔夠味，應該係話無咩嘢未。北寄貝，希靈魚同埋劍魚等等都好新鮮，色澤鮮艷。但值得一提嘅係呢度嘅象拔蚌好鮮甜，必試！！好可惜嘅係，呢度嘅刺身選擇唔夠多，但係整體而言係好食嘅。炸廣島蠔：啲蠔係唔係來自廣島就唔知啦，但係真係炸得好脆，其實係好似咬緊多士一樣。咬落去果下，蠔汁爆晒出嚟，熱度同埋鮮味都有，值得一讚。芝麻雞翼：普普通通，但係就好香，芝麻味滲入晒成隻雞翼入面。芝士焗元貝：芝士味香濃，元貝嘅鮮味就冇乜啦。但係勝在夠香口，好食。沙律嘅種類好多，可惜我無食到。飲品：種類好多，仲有啤酒添。