丼家和食 (Closed)

晚晚都想食飽飽先番屋企，今晚又係好肚餓又好想食飯，突然醒起呢間食日式飯嘅舖頭，佢有熱野又有生冷野，可以滿足晒唔同人嘅願望。我今晚想食熱野嘅，而另一半想食生冷野，而呢間店就冷熱野食都有，岩晒有唔同要求嘅我地！叫左一個溫泉蛋洋蔥牛肉丼同埋香蔥吞拿魚拖羅蓉丼，另加一個招牌鹽燒牛舌。先上枱嘅係溫泉蛋洋蔥牛肉丼，個飯面舖滿晒牛肉，紫菜下面收埋左隻溫泉蛋。牛肉嘅量好多，味道無吉野家咁甜，加埋d洋蔥好香，撈埋隻蛋個飯好滑，唔錯！至於香蔥吞拿魚拖羅茸丼，拖羅茸唔算係特別多，不過吞拿魚就算係厚切嘅，至少唔會好似食緊橡筋咁，食落唔腥，加埋隻鵪春蛋都唔錯嘅。最後叫多個燒牛舌，牛舌落鹽重手左少少有d鹹，都係丼好食d！