功夫點心工房 (Closed)

早餐時間突然好想食點心，但係又唔想去茶樓咁隆重，行過維多利亞後面天后站一帶，咁啱見到功夫點心， 所以就入去試一試。入面嘅裝修簡單，一個廚房連埋一個收銀台，另外有兩張枱，每張枱有四長櫈，所以大部分人都係叫外賣。今次，我就係堂食嘅，叫咗叉燒腸粉，燒賣同埋蝦餃。 叉燒腸方面，分量就幾多嘅，入面啲叉燒都唔慳料，所以食落去可以話係啖啖肉。而且你可以自由選擇豉油嘅份量，悉隨專便，的確幾唔錯。燒賣同蝦餃就起碼每樣要叫兩粒或以上，因為每龍係兩粒，雖然對顧客未必太方便，但係仍然可以理解。論質素，燒賣同蝦餃都好大粒，尤其燒賣同蝦餃嘅蝦肉係原隻鮮蝦，蝦餃嘅外皮晶瑩剔透，賣相亦都好唔錯。總括而言如果你食厭咗一般茶餐廳嘅麵食，功夫點心係一個唔錯嘅早餐選擇。