金田家 (Closed)

食晏時間黎落雨...本身諗住行返去上環食某拉麵，行過突然見到上環新開左金田家，由於落住雨唔想再行，所以決定就響門口等一等。入邊坐到滿座，我地又人多，所以都要等左十分鐘左右先有得坐。下午時段，我地係就咁拎住剔剔紙點菜。未入座之前，大家就響門口叫定嘢，我叫左柚子辛辣拉麵同加左一隻流心蛋。入座後都大概等左十分鐘個麵先到 (客比較多)，一試個湯...唔，唔係好夠熱喎，立時打個折扣，至於隻流心蛋普普通通，都幾好食。再食埋個麵，一夾起，即刻出煙，哦，咁樣揚揚個拉麵啲湯就熱返喇，又加返分比佢，個柚子味唔太重，攪均啲辣醬一齊食 / 飲亦啱啱好，麵質揀左軟身亦到做得到；叉燒幾大塊；總括而言，係好食嘅。至於有冇咩特色就見仁見智，不過好食嘅拉麵最好都係做好基本先，做得好先來玩花樣。湯、麵、配菜等夾埋水準都唔錯，另外重要嘅係佢唔算好油，起碼食完唔會肚痛 (係讚賞嚟) ，所以係可以再食嘅。