唯一雲貴川風味

Open Now

Now Closed

鍾意食辣嘅人應該唔會對荃灣四陂坊嘅唯一雲貴川風味感到陌生，我好耐之前都食過幾次，不過事隔太耐，加上之前無好好咁用文字記低，對佢嘅味道已經有少少模糊，於是呢次外賣就買咗小辣作為熱身。朋友嗰碗配料揀咗豬腸、腩肉、豬頭肉，我就係腩肉、豬頭肉、豆卜。豬腸都幾多肥膏，不過食落香口。豬頭肉骨位爽脆，肉軟腍有膠質。腩肉肥瘦均勻，切得大片唔薄身，本身已經有明顯嘅調味，有咬口得來又鬆化。豆卜食落外煙韌內軟綿，吸滿湯汁都唔錯。米線偏粗同軟身，外賣返去嗰陣係同湯一齊放晌同一隻碗度，不過浸晌湯度咁耐都無話變得太腍。湯入面仲有唔少酸菜、芽菜同芫茜，小辣嘅湯面泛起薄薄一層辣油，仲將成碗染成紅色，睇落都幾嚇人，但飲落嘅話辣味輕微，味濃又唔會過份重口味，食完都無乜覺得好口渴。