龍景軒

Open Now

Now Closed

嚟呢度好多次，第一☝️次食商務午餐，飽到不得了。先嚟一杯有氣茶，有3種茶溝埋，幾夾唔錯丫👌。之後嚟兩件餃子，餃子皮好黏口，肉餃香，素餃清新。再嚟一碟茄子，有兩粒喺下面，而一片茄子用粉漿炸到成個飛碟咁，仲要脆卜卜，同天婦羅一樣呀。今日老火湯係合桃眉豆花生雞腳湯，飲完唔會口渴，真材實料冇得頂。菠蘿叉燒包食過好多次，水準依然勁燒味拼盤、雞有酒、油、雞味，雞皮仲要有啲啫喱。叉燒好香蜜糖味，豬味又夠香，係差少少🤏有燶邊就正。海蜇頭夠爽彈。呢個牛面肉，一碟3大件，友人話飽比多兩件我🤦🏼‍♂️。牛煮到好腍，牛味又夠重，真係冇牙都品嘗得到。個炒飯一嚟到，香氣撲鼻，飯炒得夠乾身，欖菜、瑤柱、帶子都係切粒，飯同材料比例啱晒，一羹一啖唔會食完飯啲料都未吞到。羅漢果茶，味道好回甘，清一清口腔等食甜品。鮮淮山紫米露一放低打開，又係香到幾飽都要食埋，再加埋迷你莎翁同桂花糕，飲多兩啖靚普洱就埋單。每一次嚟到，服務員都好專業，照顧周到，係訂位比較難，同埋要食腸粉，就星期六、日、假期先好嚟，平日冇得食架👌。