肉肉強食 by 鋒膳 (Closed)

友人鐘意鋸扒，男友鐘意食漢堡，一於一齊去長沙灣東京街嘅肉肉強食，黎個肉食夜。我地總共柯打左4樣野一齊食。我叫左個厚切豬扒，鐵板上兩塊大大塊，配蒜蓉汁仲有一大匙蒜蓉，超惹味，伴菜有粟米粒，紅蘿蔔仔，車厘茄同脆肉瓜，跟餐仲有紅白餐湯，薯菜或者白飯或意粉。男友叫左個牛柳配黑椒汁，驚喜位係扭紋薯條！黑椒汁有辣勁，牛柳7成熟兩大件，無筋，牛肉味濃，心心眼。友人叫左個芝士牛肉漢堡，超大份，有牛肉芝士，生菜，無出面漢堡咁加咩花巧嘅醬汁，只係非常傳統加左茄汁，減低左牛肉漢堡嘅油膩感。另外叫左個20蚊嘅吉列豬柳開心share，唔好以為20蚊雞無咩肉食，點知都係鐵板上，淋上蒜蓉汁超正，點汁食都仲好脆，雖然唔講得上好厚，但絕對淡淡肉。餐廳採用紅色格仔餐枱布，好懷舊，但鮮艷顏色令人好開心。