安安燒 (鯉景大廈) (Closed)

今日去咗筲箕灣探朋友, 原本諗住出返銅鑼灣搵野食, 不過落雨濕濕轉咗係筲箕灣食野. 朋友介紹我去佢屋企樓下有間BBQ店.原來呢間係安安燒. 原來筲箕灣有分店. 由於我自己喜歡辣, 所以一向都幾鍾意川式串燒. 行到店門附近已經聞到香味. 呢間店唔係筲箕灣度的大街, 而係要後一條街, 因為係細街的關係所以比輕零靜, 而且我見佢有露天位座. 環境都算幾好.我地坐底就叫咗兩杯大大杯Hoeegarden啤酒, 食物都好快上枱, 熱辣辣. 因為今日飲啤酒, 所以都叫咗D濃味食物襯返. 燒芝心丸 - 裏面芝心都幾多, 因為即刻燒出黎熱辣辣, 咬開仲有拉絲的感覺; 燒鴨舌&雞腎 - 鴨舌同雞腎本身燒到好香, 加埋辣粉同孜然粉, 非常惹味; 燒鮮冬菇同燒雞脾菇就有好豐富菇汁.不過值得一提的係燒鮑魚 - 因為係新鮮飽魚, 燒完都好鮮味, 而且燒得剛剛離殼, 口感同味道都好好. 加埋蒜蓉同少少辣椒吊味, 比起平日用豉油黎蒸又係另一番茲味燒牛骨髓 - 牛骨髓口感軟稔中帶少少爽口, 用川色汁料黎炮製可以令每一條都吸收咗川汁, 但又唔會過辣, 好惹味!