老點點心竹筒飯 (Closed)

中秋節做完gym好肚餓，去附近嘅老點點心醫肚，大概下午2PM，門口已經坐咗7,8個人等枱，呢間老點點心果然多捧場客！由於2人枱，等咗約5分鐘就有枱啦！個人覺得老點點心好啱2個人去食，因為每樣點心都係得2~3件，份量唔多細細件。第一次食老點點心，叫咗佢嘅主打招牌菜－老點小漢堡，外形相當迷你的骰，一啖就食咗佢落肚！漢堡包皮煎過，入面夾住一舊炸到好香口嘅炸蝦，仲有沙津菜同WASABI味道嘅沙津漿，好好味，不過略嫌份量太少，一啖就冇咗。鮮肉響鈴腸粉，就好似炸兩嘅變奏版。個皮做得好出色！個皮好滑好嫩，已經令我好開心，入面響鈴好脆口，好味道！咸香黑魚子燒賣，非常普通，味道唔突出，只係普通嘅燒賣味道。清酒雲吞雞，一打開個迷你煲蓋嘅時候，好大陣清酒味撲鼻，有幾粒雞肉、幾粒雲吞，雲吞包得好扎實，應該係手工整做嘅雲吞，雞肉肉質太冧，冇雞肉，敗筆也。個人好鍾意食馬拉糕，所以見到斑蘭馬拉糕即刻雙眼發光！食落口其實同平時食嘅馬拉糕味道好似，但就聞到好香嘅斑蘭味，可以一試。下次會再幫襯。